۱. که تاسو کوم ډول کډوالۍ غوښتنلیک لرئ چې لا پرې فیصله نه ده شوې: ا. USCISپه X (ټویټر) کې اعلان کړی چې د امنیت او پلټنې د پروتوکولونو د بیا کتنې تر بشپړېدو پورې یې د ټولو افغان اتباعو پورې اړوند د کډوالۍ ټولې غوښتنې نامحدود وخت لپاره ځنډولي دي. برسېره پر دې، د امریکايي کډوالۍ د وکیلانو د ټولنې (AILA) له همکارانو مو اورېدلي چې USCIS اوس د ټولو فورمو (هر ډول فورمې) وروستۍ پرېکړې (منظوري یا رد) او همدارنګه د افغانانو او د سفري بندیز لاندې نورو هیوادونو د اتباعو د تابعیت د قسم مراسم هم ځنډولي دي. تمه کیږي چې دا نوې پالیسي به ستاسو او ستاسو د کورنۍ د غوښتنلیکونو پرېکړې ځنډوي.

 

. ب. USCIS یو لارښود هم خپور کړی چې له مخې یې د افغانستان څخه کډوالو د پلټنې پر مهال “منفي، هیواد پورې تړلي عوامل” په پام کې نیول کېږي. تمه کیږي چې دا نوې لارښوونه به د افغانانو لپاره د پناه، دایمي استوګنې (ګرین کارټ) او تابعیت ترلاسه کول لا ستونزمن کړي. خو تر اوسه لا دا روښانه نه ده چې دا لارښوونه به څنګه عملي شي.

​

۲. که ستاسو پر پناه غوښتنلیک (اسایلم) تر اوسه فیصله نه وي شوې:

 

ا. USCIS خپل افسرانو ته یو پالیسي یاداښت صادر کړی دی چې له مخې یې د اسایلم غوښتنلیک چې له افغانانو لخوا غوښتل شوي وي ودروي. نو که څه هم USCIS بیا د افغانانو کډوالي غوښتنې پروسس پیل کړي، ستاسو د اسایلم غوښتنلیک پرېکړه به بیا هم ځنډیږي. په دې اړه مو معلومات دي چې مرکې نه دي ځنډول شوي، نو دا ممکنه ده چې تاسو ته د مرکې نیټه وټاکل شي.

​

۳. که تاسو پناه غوښتونکی یاست او د ګرین کارټ غوښتنلیک مو (فورمه I-485 ) لا پرې فیصله نه وي شوې:

 

ا. د USCIS مشر جو اډلو یو داخلي یادښت خپور کړی چې له مخې یې د ۲۰۲۱ کال د جنورۍ له ۲۱مې څخه تر ۲۰۲۵ کال د فبرورۍ تر ۲۰مې پورې د ټولو منظور شویو پناه غوښتونکو د کیسونو بیا کتنه او احتمالي بیا مرکې امر شوې ده. دا یادښت همدارنګه امر کوي چې د دې مودې په ترڅ کې راغلي پناه غوښتونکو، د هغوی د کورنۍ غړو او تعقیبي (follow-to-join) پناه غوښتونکو د استوګنې د وضعیت د تعدیل یا ګرین کارټ غوښتنلیکونه وځنډول شي. تمه کیږي چې دا نوې پالیسي به ستاسو د ګرین کارټ پرېکړه ځنډوي، حتی که USCIS بیا د افغانانو غوښتنلیکونه پروسس کړي.

۴. که تاسو په بهر هېواد کې د کورنۍ غړي لپاره غوښتنلیک لرئ چې امریکا ته راشي:

 

ا. که تاسو د تعقیبي (Follow-to-Join) غوښتنلیک فورمه I-730 یا I-824په تمه یاست، USCIS اعلان کړی چې د امنیتي پلټنو تر بشپړېدو پورې یې د ټولو افغان اتباعو پورې اړوند کډوالي غوښتنې نامحدود وخت لپاره ځنډولي دي. نو ستاسو د کورنۍ غوښتنلیکونه به ځنډیږي.

 

ب. که ستاسو فورمه I-730 (د پناه غوښتونکي/پناه اخیستونکي د خپلوانو پټیشن) منظوره شوې وي، د ۲۰۲۵ کال د جون په میاشت کې اعلان شوی سفري بندیز اوس په I-730 فورمو هم پلي کیږي. نو حتی که ستاسو د کورنۍ غړي په سفارت کې مرکه بریالۍ کړي، ویزه به ور نه کړل شي.

 

ج. که تاسو د افغان ځانګړي کډوالۍ ویزې (SIV) لرونکی یاست او ستاسو د کورنۍ غړي DS-260 لا بشپړه نه ده، د امریکا د بهرنیو چارو وزارت په X کې اعلان کړی چې “د افغان پاسپورټونو په اساس د سفر کوونکو لپاره د ویزې ورکولو سمدستي ځنډول” یې کړي دي. نو حتی که ستاسو د کورنۍ غړي مرکه بریالۍ کړي، ویزه به ورنه کړل شي. خو مرکې نه دي ځنډول شوي، نو ممکنه ده چې مرکه وټاکل شي.

​

۵. که تاسو ته د (اسایلم) یا پناه غوښتونکي حیثیت (Refugee Status)، یا ګرین کارټ یا کوم بل د کډوالۍ ګټه درکول شوي وي:

​

USCIS خپلو افسرانو ته یو پالیسي یاداښت صادر کړی دی چې غوښتنه یې کړې ده د ټولو هغو منل شوې ګټوغوښتنو بشپړه او جامع بیا کتنه وکړي چې د افغانستان څخه هر هغه کس ته ورکړل شوې وي چې د ۲۰۲۱ کال د جنوري ۲۰ یا ورسته یې متحده ایالاتو ته راغلي دي. په هرحال، تر اوسه روښانه نه ده چې د دې بیا کتنې پروسه به څنګه وي او کوم معیارونه به پرې تطبیق شي.

۶. که تاسو ته د پناه غوښتونکي حیثیت (Refugee Status) درکړل شوی وي:

​

۱. د USCIS مشر جو اډلو یو داخلي یاداښت خپور کړی چې له مخه یې د ۲۰۲۱ کال د جنورۍ له ۲۱ څخه تر ۲۰۲۵ د فبرورۍ تر ۲۰ پوري د ټولو منظور شویو پناه غوښتنکو کیسونه بیا کتنه او احتمالي بیا مرکه به کېږي. دا یاداښت همدا رنګه امر کوي چې د دې مودې په ترڅ کې راغلي پناه غوښتونکو، د هغوی د کورنۍ غړو او تعقیبي پناه غوښتونکو د استوګنې د وضعیت د تعدیل غوښتنلیکونو یا ګرین کارټ دې وځنډول شي.

USCIS به د وړتیا ټول معیارونه بیا وڅېړي. په ځانګړي ډول به وڅېړي چې آیا غوښتونکي د نورو پر وړاندي کله هم د نژاد، دین، قومیت، سیاسي نظر، یا تولنیزې ډلې پر بڼسټ ظلم کړی که نه.

​